أصدرت أسرة الموسيقار الراحل حسن أبو السعود بيانا ترد فيه على التصريحات المسيئة له والتي أدلت بها الفنانة شيرين عبد الوهاب مع الإعلامية لميس الحديدي ضمن برنامج “كلمة أخيرة”.
جاء نص البيان كالآتي:
في ميزان الإنسانية إيه قيمة الموهبة إذا اقترنت بالإساءة والأذى؟
التنمر والسخرية من الناس عيب..بس العار الحقيقي التنمر والسخرية من شخص ميت – ومش حقول شخص واكلين معاه عيش وملح وله فضل علينا..لأن قليل الأصل ممكن يتناسى وينكر ده عادي – لأن الإساءة لشخص ميت مستوى أكثر انحداراً من الشر والدناءة.
وقت الحساب..المسيىء حيقول لربنا إيه..حيقوله لأ متحاسبنيش إني بتريق على ميت وبجرحه وبجرح محبيه وأسرته، أصل أنا موهوب أو مشهور أو غني؟ لأ متحاسبنيش أصل أنا أحسن فنان في الكون؟؟
للأسف المسيىء في ابتلاء شديد، مش فاهم إنه عمال يحفر ويوسع في الحفرة لنفسه..
للأسف الشر زايد وقلة الأصل زايدة وقلة الأدب مسكوت عنها، وكمان الأفاقين ماسكين راية دفاع مستديم عن الظلم والإيذاء.
ميزان وبيتملي..ربنا يجعل وجع قلوبنا ودعائنا الليلة دي وليالي قبلها بسبب الإساءة المتكررة والحقد الظاهر في الطاقة والكلام من نصيب أي وكل مُسيىء.
كلمة أخيرة..حسن أبو السعود الله يرحمه شكلاً كان قمرا وشخصيةً كان دمه سكر وطيب وكريم ومتواضع ومثقف وبيتكلم 3 لغات أجنبية بطلاقة ولبق وذوق..فمش ممكن حتكوني شبهه في يوم من الأيام.
وكانت شيرين أساءت للموسيقار الراحل عندما شبهت شكلها به في وصف لحياتها مع طليقها حسام حبيب.
