نشرت الفنانة نشوى مصطفى تعليقا عبر حسابها على موقع التواصل الاجتماعى فيسبوك توضح فيه أسباب كتابتها تعليقا عن عدم ممارسة مهنتها كممثلة وتوجيه رسالة إلى الفنان أشرف زكى.
وقالت نشوى: “دكتور أشرف زكى مش مجرد رئيس أكاديمية الفنون ولا مجرد نقيب ممثلين — أشرف أخويا — أخويا اللي يوم ما أبويا مات لقيتنى بامسك التليفون وباتصل بيه أول واحد — قبل ما أتصل بأهلى — يمكن بنقعد بالشهور ما نتكلمش — بس فى الشدة أشرف سند — حتى وهو بيعاتبنى وبيقول لى حيفضل عيبك الوحيد من يوم ماعرفتك من تلاتين سنة إنك بتتصرفى بإحساسك من غير ماتفكرى — أوعدك يا أشرف إنى حاحاول ما أتصرفش أى تصرف غير لما أعديه على عقلى قبل إحساسى – بس ما أوعدكش إنى حاعرف”.
وردت نشوى مصطفى على الشامتين والحاقدين عليها بعد كتابتها لهذا التعليق قائلة : “من يومين كتبت بوست والحقيقة كالعادة الفترة اللي فاتت بقيت أى حاجة باكتبها بيكون رد الفعل تجاهها أكبر من توقعاتى بمراحل — البوست كان ملخصه إنى عايزة أمثل — والحقيقة أي فنان زميل حيفهم معنى إن طاقتك وموهبتك متعطلة إنك تكون مركون على المعاش وانت لسه عندك طاقة بدليل أن العظيمة أمينة رزق كانت بتمثل لآخر يوم فى عمرها اللي تجاوز التسعين سنة — وإنها قدام الكاميرا كانت بتتحول لطاقة فنانة فى التلاتين.
وأضافت نشوى : “المهم إنه اتفهم من البوست إنى لاسمح الله محتاجة أمثل علشان محتاجة فلوس مثلًا — وده عرفته من كم التليفونات اللي تلقيتها أو من كم الناس السفلة الشمتانين الكارهين واللي بيكرهوا أي حد بيقول تحيا مصر — وأحب أوضح لكل الناس محبين أو كارهين أنى من فضل الله سبحانه وتعالى مستورة جدًا وإنى متزوجة من راجل بيعولنى ومن فضل الله زوجى عنده بزنس ساترنى وساتر بيتى وولادى اللي بفضل الله اتعلموا جوه مصر وسافروا كملوا دراستهم فى أمريكا وألمانيا وبفضل الله وبكرمه ونعمته واجتهاد زوجى الحمد لله مستورة — وأن زوجى معاه جنسية أمريكية وأنه من الممكن أنه ننتقل للعيشة فى أمريكا ودخلنا من شغله يكون أعلى بس إحنا زي السمك مانقدرش نسيب مصر.
وقالت نشوى مصطفى : “اعتذر لكل القنوات العربية والمصرية اللي كلمونى علشان يستضيفونى علشان نتكلم فى البوست — وباشكر إخواتى وأصدقائى المنتجين فى الكويت وفى الإمارات على عروضهم الطيبة وفعلًا الفنان فنه مالهوش حدود تقاس بالكيلومترات — انا بحبكم”.
