انخفاض أسعار الدواجن يشجع الأمهات على تخزينها سندوتشات للمدارس

مع الإعلان عن خفض أسعار الدواجن من 26 إلى 18 جنيهاً للكيلو، انتهز كثير من الأمهات الفرصة لتخزينها استعداداً للعام الدراسى الجديد، ما انعكس على المحلات، فازداد الإقبال عليها بعد فترة ركود بسبب ارتفاع الأسعار.

«بانيه، شيش طاووق، شاورما وكفتة فراخ»، أطباق جهّزتها آية حمدى، ربة منزل، ووضعتها فى مبرّد الثلاجة بهدف استخدامها كوجبات لأطفالها مع بدء الدراسة: «كيلو الفراخ البيضا بـ18 جنيه، فخزنت حوالى 15 فرخة، بجيب الواحدة وأقطعها 8 قطع، وساعات بطلّع منها كل حاجة، لأن ولادى بيحبوها جداً، وبعملها سندوتشات لللانش بوكس باستمرار، وده اللى شجعنى على التخزين».

اعتادت «آية» على تخزين الدجاج منذ 5 سنوات: «من أول ما ابنى دخل المدرسة باشتريها طول الوقت وأخزّنها فى فترات انخفاض الأسعار، بتسهّل عليا كتير، وبتوفرلى فى ميزانية البيت».

خفض الأسعار أنعش سوق بيع الدواجن أيضاً، وصفحات تجهيز الطعام على مواقع التواصل الاجتماعى «فيس بوك»، وفقاً لأحمد غازى، الذى يعمل فى مجال الدواجن منذ 6 سنوات: «المدارس قربت والشغل بيزيد، وبنستعد للموسم بتنضيف الفراخ وتبريدها، دى الطريقة الصحيحة للتخزين، وبعد ما ست البيت تشتريها بتجمدها لوقت الاستخدام».

ويحذر الدكتور مجدى نزيه، رئيس وحدة التثقيف الغذائى بالمعهد القومى للتغذية، من تخزين الدجاج بالـ«فريزر» لمدة تزيد على 3 شهور: «ماينفعش لحوم الدواجن تتخزن لفترة طويلة زى ما البعض فاكر، لأنها معرضة للتحلل والفساد، كمان فيه معلومة مهمة لكل ست بيت، الفراخ ماتطلعش من الفريزر بعد مرحلة التجميد إلا للطبخ، ماينفعش أبداً تطلع تفك وتدخل تانى».